مجلة الاتصالات
كتب رانيا الفقى
اليوم الاول
هناء : ايه الجمال دا يامنى ايه الطقم الجامد دا جايباه بكام تلاقيه غالى قوى .
منى: تسلمى والله مش غالى ولا حاجه.
هناء : ازاى بقا دى انتى اللى زيك لازم تلبس اغلى البرندات هو انتى مش لابسه دهب ليه؟آآ
منى : ليه كل دا يعنى.
هناء: ايه يابنتى مش جوزك شغال فى الخليج بقاله كام سنه الا هو بيقبض بالريال ولا بالدينار ؟
منى: الحمد لله مستورة عن اذنك مضطرة امشى.
اليوم الثانى
هناء : ايه يابنتى وشك تعبان كده ليه ومجهد كأنك سهرانه طول اليوم مش عارفة واحدة زيك تسهر ليه مفيش حد بيطلب منك كل شويه تعمليله شاى ولا اكل ولا تكويله قميص يابختك.
منى: ابنى كان تعبان شويه وبعدين ماانا برده بعمل اكل للعيال وبكوى هدومهم وبودى مدارس وتمارين ومفحوته.
هناء: اه تلاقيكم مشتركين فى نادى كبير.
منى :لا عادى نادى جنب البيت.
هناء: ازاى بقا؟!! هو جوزك بيبعتلك كام فى الشهر على كده ؟ منى : الحمد لله مستوره عن اذنك انا مضطرة امشى.
اليوم الثالث
منى: فى ايه ياكريم خايف كده ليه؟
كريم: ياماما انا سامع صوت فى المطبخ وحاسس ان فى فار منى: فار ازاى دا انا قافلة الشباك كويس دخل ازاى؟!
كريم : مش عارف ياماما بس الصوت عالى قوى ممكن تروحى ارجوكى انا بخاف من الفيران.
منى: بصوت خافت ومين سمعك انا بترعب منهم فينك ياعادل دلوقتى حاضر ياكريم متخفش انا رايحه خليك انت مع اخوك الصغير وانا هتصرف .
اليوم الرابع
هناء : ايه يامنى ايه التليفون اللى ماسكاه ده؟
منى: ماله ياهناء ماهو شغال اهو.
هناء: ياشيخه دا تليفون واحدة زيك جوزها شغال فى الخليج اقل حاجه تجيب ايفون.
منى:لا كده كافيه يامدام هناء انا ساكته بقالى كتير ومش عايزة ارد انتى فاكرة ان اللى جوزها متغرب دى عايشه فى جنه جربتى احساس الوحدة انك تعملى كل حاجه لوحدك تاكلى لوحدك تخرجى لوحدك كل لحظات حياتك تعيشاها لوحدك جربتى احساس الرعب انك تسمعى صوت بره الشقة فتفكرى ان فى حرامى وتقومى جرى تتاكدى ان كل الابواب مقفوله وتبقى قاعدة مرعوبه وخايفة ليحصلك حاجه انتى وولادك جربتى احساس ان جوزك يكلمك ويقولك انه تعبان ومش قادر وانتى مش عارفة تعملى حاجه او العكس ابقى تعبانه وبموت ومش عارف هو يعملى حاجه.
ياريته ماكان سافر وبعد عنا ايه فايدة الفلوس واجمل لحظات حياتنا مش مع بعض ها تحبى تعيشى زى ؟ ساكته يعنى؟”
مش دايما اللى ظاهر هو الحقيقه دايما المظاهر خداعه فى ناس من بره تبان بتلمع وهى من جوه مطفيه”
