الثلاثاء , 16 أبريل 2024
أخبار عاجلة

مروة منير تكتب عاليها واطيها

انك تضع حدود بين دولتين او توقف اشتباك بين قطرين او تعمل هدنه بين كوكبين او مجرتين ..

اسهل بكتير من انك تفض اشتباك بين عيلين او تعرف مين الغلطان ف خناقه بين اخين او اختين او .. يجيوا الاتنين او التلاته او الرابعه ع حسب ما ربنا يرزقك … يصرخوا ويك ويك يسمعوا اخر جار ف مجره درب التبانه و يهبدوا هبد و يعيطوا عياط هيستيري كل ٣ فيمتو ثانيه .تسمع ما لذ و طاب
بصلي ..بصتلي
قالي … قولتله

  • عامل يبصلي كل شويه
    لاء ده وربنا اللي باصلي الاول

-لاء ده كان ماشي و زقني
محصليش ده هو و ربنا اللي زقني الاول

ماشي و شتمني من غير ما اعمله حاجه
لاء و الله هو اللي شتمني الاول

بصلي و هو بيضحك اكيد بيتريق عليا
لاء ده هو اللي اتريق عليا الاول

  • خد اللعبه اللي كنت بلعب بيها
    و الله اللعبه دي كانت ف ايدي الاول

دبحني ف مشاعري …
لا ده هو و الله اللي دبحني الاول

مع تكرار كل جمله من ٩٠ ل ٤٩٠ مرة ف الدقيقه و الجدع يعرف يفصل بينهم و لو عملت فيها قاضي محكمه دوليه و حبيت تحكم باللي انت شفته او ما شفتهوش و تؤمن ان العدل اساس الملك

اتفضل اسمع بقي

اصل انت بتحبوه اكتر مني
انت مش بتصدقوني انا و بتصدقوها هي
انا مظلوم …
هو الخائن و انا شهيره
هو المفتري و انا ذليله ….و اورغل اورغل و هلما جر

تلاقي الحل انك تقوم تجيب عاليها واطيها ع الكل كليله ..بس بعدها خد بالك هتحتاج يتعلق لك محاليل لان مجهودك بقي ميجيبش زق تربيزه نص متر لادام

رغم صعوبه ما نمر به و يمر به الاخرون و صعوبه التعامل مع الابناء عشان تطلعهم من غير عقد و لا شراشيب بس اللي يخوف اكتر ان كل ما بنكبر و هم بيكبروا الامور لا تزداد سوي صعوبه و لكن يظل هناك امل ف الله ..و الاستمرار ف الدعاء لهم بصلاح الحال و الاحوال

شاهد أيضاً

مصطفى حسين يكتب تبسيط إجراءات العمل

اسلوب العمل ما أروع ان تتعامل مع الزملاء فى وقت العمل وبعد مواعيد العمل بتبسيط …