مجلة الاتصالات
الشعر بعنوان
” وضوح وطموح “
✍️ المهندس مختار عبدالمنعم السنوسي
مدير إدارة سنترال إسنا – منطقة الأقصر
شخصيتي كده زي ما هي
و محدش له حاجة عليا
كل الناس مليانه مشاكل
و مشاكلي أنا مليا عنيا
لا تقولي خد جرب ديا
كبسولة تنمية بشرية
تتعلم تتواصل بيها
مع بيئة فاقدة الأهلية
تتعلم تضحك عالفاضي
و مشاعرك خبيها شوية
خليك وسط الناس بسكوته
و ما تجادل عن أي قضية
الناصح يكسب بسكوته
و الكلمة أخرتها أذية
يتقال عنك كله مشاكل
و لا تخلص شر و مرازية
خليك صورة بتلمع زاهيا
و سيبك مالقيمة الإضافية
لا تقولي نخوة و كرامة
و شهامة و الأفلام ديا
و رجولة راحت أيامها
إخلاص إيه و إيه تضحية
لا عفواً خليني مكاني
لن أحيا دمية بشرية
هحياها بصميم وجداني
لحم و دم و صرخة قوية
و ان ضاعت أحلام و أماني
فسَكينة بتحوم حواليا
و إيمان تبقى كل حياتي
و تحية … لنفس صفية