أخبار

اقتربت الامتحانات

كتب د/ حمادة خلاف ...

استشاري الصحة النفسية، ومدير أكاديمية تواصل لرعاية الاطفال وذوي الاحتياجات الخاصة بالاسكندرية

[ في الحقيقة خلاص النصف الأول من العام الدراسي الحالي تقريبًا انتهى عشان نبدأ موسم الامتحانات وشد الأعصاب والقلق والتوتر واعلان البيوت حالة الطوارئ وشد الاحزمة. في البداية أنا حبيت أكتب هذه المقالة بشكل كوميدي لحد ما وبلغة أقرب للعامية بعيدًا عن الكلام المعتاد فياريت نهدى كده ونقول بسم الله الرحمن الرحيم، ولازم نعرف إن درجات الامتحان مش هي أخرت الدنيا وشباب زى الورد في هندسة وطب بينتحروا فنفسيت ابنك او بنتك أهم من الدرجات، طب يعنى خلاص نقضيها فرفشة وبلاش مذاكرة؟ لا والله يا حاجة أنا مقولتش كده، صل على النبى كده وركزي معايا شوية الله يكرمك فى النصايح اللى جاية ... وطبعًا النصايح دي لحضرتك كأم عشان طبعًا الأب هربان بره البيت وانت اللى شايلة الليلة كلها على دماغك الله يقويك ويعينك ويجعله فى ميزان حسناتك ما هو بردو النبي وصى عليك والجنة تحت قدميكى. خدى بالك بأه... 1

- ترتيب البيت وتهيأة الجو المناسب للمذاكرة.. يعني.. ( نقلل المشاكل اللى ما بتخلصش- صوتنا العالي يوطى- نقلل الكلام في التليفونات والزيارات- بلاش الافلام والمسلسلات ليل ونهار). 2

- التشجيع المستمر والتعزيز فترة الامتحانات دا كلها اسبوع او اتنين تعالى على نفسك شويه يعنى ( برافو – شاطر- اهم حاجة انت يا حبيبى- شد حيلك ربنا معاك- مشروب ساقع اودافي حسب الجو- انت بتتعب وربنا هيكرمك- اجتهد واللى ربنا يجيبوا كله كويس). 3

- بلاش بالله عليك الكلام اللى يسد النفس ويحبط ويجيب اكتئاب زي( يا فاشل- يا غبي- دا فلان اشطر منك- كام مرة فهمتك الحاجة دى وانت برده مبتفهمش- انت هتفضل طول عمرك كده.... الخ). 4

- مساعدتهم على تنظيم وقت للمذاكرة والراحة واللعب، اللعب؟!! لعب ايه يادكتور ايام الامتحانات.. ياحوستى .. اه لعب ياحاجة لازم يخرج من جو المذاكرة شوية يستعيد نشاطة حتى لو عشرة ضغط او بطن مش مشكلة المهم اى حركة وفيها بركة. 5

- الصبر ثم الصبر، وانا عارفك هتقولى صبرت كتييير.. يا ستى معلهش اعصري على نفسك سلة لمون واستحملى الكام يوم دول. 6

- طب وأخينا اللى ضرب الدنيا طناش ده ملهوش نصيحة هو كمان، لا حاضر من عنية، يا سيدى الله يكرمك ساعدنا شوية واعرف ان دول هم كمان ولادك ونجاحهم يرفع راسك ويشرفك، خدلى بالك بأه وطأطا ودانك ياعم الحاج عشان النصيحة دى لك يعنى لو انت مثلا شاطر فى أى مادة حاول تراجع مع ابنك اوبنتك، ادعمهم نفسيا بالقبلات والاحضان اه والله، بس الله يرضى عنك لو هتتعصب وتشتم وتزعق وتقلبها غم ونكد خليك بره أحسن، عشان عارفك أول الولا او البنت ماهتقفل معاك ربنا يستر هتولع نار. أما بالنسبة للابناء المقبلين على الامتحانات، كلامي معاكم هيكون على الهادي فياريت نعرف ان دي أهم فترة فى السنة وهي فترة جني الثمار والحصاد وهي بتكون فترة قصيرة جدا مقارنة بالسنه الدراسية طب لخص عشان مش فاضيين.. يعنى نعمل ايه ؟ حاضر انتم جيل اليومين دول مفيش صبر .. يلا بينا 1

- أنظم غرفتي ومكتبى وأجهز ادواتى واقلامى وكتبي. 2

- جدول مذاكرة مايخرش الماية بالدقيقة والثانية 3

- احافظ على الجانب الروحي ياروحي يعنى صلاتي وقربي من ربي مهم جدا. استعين بربنا على مذاكرتك والدعاء بالتوفيق والنجاح وانه يثبت المعلومات في دماغك اللى الفيس والواتس هرشوها. 4

- احافظ على الجانب البدني وصحتي لو بلعب رياضة اكمل مش هتعطلني، بس اقلل في عدد التمرينات شوية وانجز حالى وارجع علطول عشان جدولى ولو مش هتعرف تظبط حالك، بلاش تمرين يابطل غير بعد الامتحانات واتمرن فى البيت ياحلو. 5

- اتغذى كويس جدا واشرب سوايل كتير طبيعية وابعد نهائي عن اي حاجه فى كيس من السوبرماركت طبعا فاهمني. 6

- خلى بالك اعصابك خليها فى تلاجه ولوفيه شوية توتر وقلق امتحانات يبأة انت كده طبيعى جدا عادي هيروح بمجرد ما بتشوف الاسئلة وتجاوب. 7

- ليلة الامتحان حاول تنام بدري وتكون مراجع مادتك كويس. 8

- يوم الامتحان الصبح صلى الفجر وأقرأ ولو خمس آيات. 9

- راجع مادتك سريعا والنقاط المهمة. 10

- بوس ايد ماما وبابا واطلب منهم الدعاء. 11

- قبل الامتحان بنص ساعه اقفل الورق لان خلاص المعلومات فى العقل الباطن ماتقلقش هتيجى لما ورقة الاسئلة تكون قدامك عشان بتجمع تركيز في الاسئلة بس مش كل المنهج. 12

- هتحس انك مش فاكر حاجة قبل ماتدخل اللجنة ده عادى جدا لانك هتفتكر ايه ولا اية فبلاش تتعب نفسك. 13

- دخلت اللجنة خد نفس عميق وبهدوء وتذكر ان ربك كاتبلك درجتك بس انت بتاخد بالاسباب. 14

- استلم ورقتك بيمينك وقول بسم الله واقرا الاسئلة كويس أوى وما تخافش ولا تقلق ان فيه حاجة مش قادر تفتكرها. 15

- ابدا بالاسئلة السهلة واللي ماتخدش وقت طويل، هتشعر بالراحة وتبدأ الاجابات تيجى في دماغك. 16

- راجع الورقة كويس جدا وتأكد انك مانسيتش أى سؤال. 17

- اختم بالحمد لله وماتراجعيش بعد ماترجع البيت. 18

- خد دش دافي وريح شوية يابطل واقفل صفحة

 

 

 

 

 

 

 

عن الكاتب

بلال قنديل 1156 مقال

عن الكاتب"

عن التعليق

اضف تعليق